Nananatiling puno ang Bulacan Infection Control Center-Bulacan Medical Center COVID-19 treatment facility. Larawan ni Anton Luis Reyes Catindig

LUNGSOD NG MALOLOS–Pumalo na sa 32 ang bilang ng Delta variant cases sa Bulacan sa patuloy na pagtaas ng mga kaso ng COVID-19, base sa huling tala ng Bulacan Public Health Office.

 Ayon kay Dr. Hjordis Marushka Celis, Bulacan COVID-19 Task Force vice chair 4 mula sa 32 mga kaso ay returning Overseas Filipino Workers habang ang 28 ay mga local cases na maaring nakuha sa Metro Manila, sa Bulacan at sa iba pang lugar. 
Nauna na ring tala na may kabilang na Bulakenyong workers sa Metro Manila sa mga nahawa ng Delta variant.

Mula sa 28 na ito,  18 ang record ng new cases na ibinaba sa kanila ng Department of Health nitong Agosto 23 matapos lumabas ang resulta mula sa Philippine Genome Center noong Agosto 21. 
Ayon sa pinakahuling tala, may 55,383 na COVID-19 cases sa lalawigan, 3,973 dito ang active cases, 1,127 ang namatay at 50,283 ang recoveries.