JOYCE MARIE G. DALISAY
GUIGUINTO NATIONAL VOCATIONAL HIGH SCHOOL TEACHER I
Patuloy na gumaganda ang laban ng Bulacan sa COVID-19 dahil sa pagtatala nito ng 90% recovery rate. Simula noong unang nagkaroon ng outbreak ng sakit na ito March last year ay mataas na ang recovery rate ng lalawigan at nanatili ito sa ganoong estado.
Sa ngayon ayon sa ulat ng Bulacan Provincial COVID-19 Task Force sa pangunguna ni Gob. Daniel Fernando ay 29,425 ang mga nakarecover sa COVID-19 mula sa confirmed cases na 32,777. Ang datos na ito ay mula sa 21 bayan at tatlong siyudad sa lalawigan.
Pumalo naman ang cases of death sa 705 at ito ay 2% lamang sa kabuuang bilang ng mga confirmed cases.
Patuloy na ring bumaba ang mga active cases sa 2,647 ngayon at ang mga naka admit na lang sa hospitals ay nasa 154 na lamang at ito ay nasa 5% kumpara noong mga nakakaraang linggo na umabot sa mahigit 200 pasyente ng COVID 19 ang nasa mga ospital natin dito sa Bulacan.
Ipinagpapasalamat ng gobernador ang patuloy na pagtalima at pakikiisa nating mga Bulakenyo sa minimum health protocols at kahit pa tayo ay nasa NCR Bubble Plus na nagtala ng second wave pangunahin ang Metro Manila at kasama pa ang mga lalawigan ng Rizal, Cavite at Laguna ay gumaganda na talaga sa ngayon ang ating laban sa COVID-19.
Inamuki niya ang lahat na patuloy na mahigpit na tumalima sa mga health protocols lalong lalo na ngayon na isinailalim tayo sa lighter restriction na General Community Quarantine o GCQ but with stricter restrictions. Nasa 30% na ang dine-in sa mga restaurants at kabilang ang piling tourism destinations gaya ng resorts. Ganoondin, nasa 30% na ang accommodation sa mga beauty salons and spas at maging ang religious gatherings.
Kamakailan lang ay binawi na rin ng gobernador ang liquor ban executive order nito.
May munti lamang po akong panawagan sa ating mga katulad na netizens, na huwag na pong mag-share and share ng mga kuwento o balitang natatanggap nila na paparating na daw ang THIRD WAVE at ito daw ay paghandaan. Isang malaking pinagmumulan po ito ng panic at takot.
Ang panic at takot ay pinagmumulan ng paranoia na nagpapalito sa tao na nagdudulot na mamali ang desisyon at mga hakbangin imbis na mabuti at maganda para sa pamilya at nagdudulot din po ito ng sakit na anxiety hanggang sa mauwi sa nervous breakdown. Ang atin pong gawin ay masugid na sumunod at isabuhay ang health protocols, palakasin ang katawan upang lumakas ang immune system, iwasang lumabas ng bahay kung hindi kailangan, magdasal ng taimtim para sa sarili, sa pamilya, sa ating mga mahal sa buhay, sa ating bayan at sa mundo. Itigil po nating maging kabahagi ng FAKE NEWS at MISINFORMATION.
