Kabilang ang mga senior citizen sa patuloy na binakunahan noong three day national vaccination. Larawan ni Anton Luis Reyes Catindig
Ni Anton Luis Reyes Catindig
LUNGSOD NG MALOLOS–Malapit ng maabot ng Bulacan ang herd immunity nito laban sa COVID-19 matapos na mapaakyat pa ang bilang ng nabakunahan sa isinagawang three day national vaccination nitong Lunes-Miyerkules.
Ayon kay Dr. Hjordis Marushka Celis, Bulacan COVID-19 Task Force vice chair, halos nasa 70% na ang mga may first dose at malaki ang naidagdag ng 199,613 na mga nabakunahan noong three day vaccination.
Nauna ng ibinahagi ni Gob. Daniel Fernando noong Martes na nasa 55% na ng 2.8 million heard immunity ng lalawigan ang may first dose habang 45% naman ang second dose.
Noong Lunes, nagtala ng 46,529 na mga nabakunahan sa buong lalawigan, 51,788 noong Martes at 101,296 noong Miyerkules kaya’t umabot sa kabuuang 919,613.
Patuloy pa rin ang pagbabakuna at inaasahan ni Gob. Fernando na makakasabay at makakasunod ang Bulacan sa target ng national government na marating ang herd immunity bago matapos ang taon.
