PANDI, Bulacan—Pinagningning na ng mga pinuno ng bayang ito ang kanilang giant Christmas Tree sa harapan ng gusali ng pamahalaang bayan hudyat ng liwanag at pag-asa para sa pagbangon mula sa hagupit ng pamdemyang dulot ng COVID-19 simula sa darating na 2022 at sa mga susunod pang panahon.
Lubos ang tuwa at pasasalamat ni Mayor Enrico Roque sampu ng kanyang mga kasamahang lingkod bayan sa pangunguna ni Vice Mayor Lui Sebastian at mga konsehal ng bayan sapagkat ang Pandi ay natatanging bayan sa Bulacan na umabot at nakalampas na sa target herd immunity matapos na umakyat na sa 87% ang nababakunahan.
Sa edad namang 12-17 years old ay 67% na ang nabakunahan, ani ng alkalde.
Sa mahigit na 155,000 populasyon ng Pandi ay may herd immunity o (70%) ito na nasa mahigit 115,000. Sa 87% nitong mga nabakunahan ay nasa halos 95-100,000 na ang nababakunahan.
Ipinagmamalaking ibinalita ni Roque na kahilera ng Bayan ng Pandi ang Provincial Health Office ng maraming probinsiya at piling bayan sa rehiyon sa listahan ng Department of Health ng mga local government units na nangunguna sna maabot at malampasan ang herd immunity target at sa patuloy ring pagkakaroon ng sapat na supply ng bakuna.
Lubos ang pasasalamat ni Roque kay Pandi municipal health officer Dra. Maricel Atal sa mabilis at maagap na programa at aksiyon nito para sa agarang pagbabakuna upang maging ligtas ang lahat ng kanilang mga mamamayan mula sa COVID-19.
Gayundin, ani ng alkalde, ang proteksiyon ng bayan sa COVID-19 dahil sa bakuna ay naisakatuparan sa tulong at pagmamalasakit ng mga volunteer na doctors at nurses at iba pang medical front liners.
Ikinatuwa din ng alkalde ang naging magandang bunga ng desisyon niyang pagbili ng munisipyo ng mga freezers upang paglagakan ito ng mga bakuna sapagkat malaki ang naitulong nito upang magkaroon sila ng maraming supply ng bakuna.
Ayon kay Roque, ang pagniningning ng kanilang Christmas Tree ay nagbibigay ng kumpletong pagdama sa diwa ng Kapaskuhan sa ngayong taon kumpara noong isang taon na matindi pa ang mga kaso ng COVID-19 at hindi sila nakapagsama-sama tulad ngayong taon para sa Christmas Tree lighting dahil natakot silang ang gathering nila ay maging “super spreader” ng COVID-19.
“Noong isang taon ay parang kulang ang pagdama natin sa spirit ng Pasko dahil hindi tayo nakapagsama-sama ng ganito,” aniya.
Ang Bulacan ay patuloy at pangalawang beses ng nasa ilalim ng mas maluwag na Alert Level 2 mula Nobyembre 15-30. Nauna na ang mas magaang na quarantine status na ito noong Nobyembre 1-14.
