Binuksan na ang Negosyo Center sa San Ildefonso na katabi ng bagong gawa na Business One Stop Shop (BOSS) sa San Ildefonso Commercial Complex (SICC) na pag-aari ng pamahalaang bayan. Target na lalo pang mapabilis ang mga proseso sa pagkuha ng business names at business permits. (Shane F. Velasco)

Ni Shane F. Velasco

SAN ILDEFONSO, Bulacan (PIA) – Sabay na binuksan sa San Ildefonso ang magkatabi nang mga tanggapan ng Negosyo Center ng Department of Trade and Industry (DTI) at Business One Stop Shop (BOSS) ng pamahalaang bayan.

Matatagpuan ito sa ikalawang palapag ng San Ildefonso Commercial Complex (SICC) kung saan mayroon itong malaki at maaliwalas na espasyo. Ang SICC ay ipinatayo, pinapatakbo at pag-aari ng Pamahalaang Bayan ng San Ildefonso upang mapagkunan ng karagdagang pondo bukod sa nakokolektang buwis at Internal Revenue Allotment (IRA).

Ayon kay DTI-Bulacan Provincial Director Edna Dizon, napapanahon ang pagbubukas nitong Negosyo Center sa San Ildefonso, na pang-22 sa Bulacan, ngayong bagong lipat ang B.O.S.S. ng pamahalaang bayan.

Naaayon aniya ito sa mga repormang pang-ekonomiya ni Pangulong Rodrigo Roa Duterte sa bisa ng Republic Act 11032 o ang Ease of Doing Business and Efficient Government Service Delivery Act. Naglalayon ito na mas pabilisin ang lahat ng mga sistema sa pamahalaan partikular na ang may kaugnayan sa hanapbuhay.

Sinabi ni Mayor Carla Galvez-Tan na target ng pamahalaang bayan na lalo pang mapabilis ang mga proseso sa pagkuha ng bago o renewal ng mga business permits sa pagbubukas nitong B.O.S.S. Sa ngayon, nasa isa hanggang dalawang araw ang proseso sa  bagong business permit at isang araw kung renewal.

Matatagpuan na sa San Ildefonso Commercial Complex (SICC) ang Business One Stop Shop (BOSS) na bagong kuhanan ng mga renewal at bagong business permits. Katabi nito ang bagong bukas din na Negosyo Center kung saan pwede nang makakuha ng business names sa Department of Trade and Industry (DTI) na hindi na kailangang sumadya sa San Rafael o sa Malolos. (Shane F. Velasco)

Sa pagbubukas ng Negosyo Center kasabay ng B.O.S.S., kung saan kumukuha naman ng mga business names sa DTI, tinatarget na mapabilis pa sa isang araw ang naturang mga proseso.

Uubra ring dito gawin ang mga serbisyong may kinalaman sa business advisory gaya ng mga nais makahiram sa Small Business (SB) Corporation ng DTI ng karagdagang puhunan, kasanayan para mapalawak ang merkado at maitaas ang antas ng kalidad ng isang produkto.

Kaugnay nito, binigyang diin ni Mayor Tan na ang pagkakatabi ng Negosyo Center at ng bagong B.O.S.S ay pakikinabangan agad ng mga bagong micro, small and medium enterprises sa San Ildefonso.

Pangunahin dito ang 25 na indibidwal na pinagkalooban ng E-Bikes upang magkaroon ng hanapbuhay sa paglalako. Pinondohan ito ng halagang P5 milyon mula sa Local Government Support Fund (LGSF) ng Department of Budget and Management (DBM).

Iba pa rito ang halagang P3 milyon mula sa tanggapan ni Senador Christopher Lawrence ‘Bong’ Go na inilaan sa 50 benepisyaryo upang makapagbukas ng mga Sari-Sari Store na may kasamang Bigasan. May pasunod pa itong P2 libong karagdagang puhunan mula sa pamahalaang bayan.

Samantala, inaasahan din ang pagdaragdag ng bilang ng mga MSMEs na gagawa ng mga produkto sa ilalim ng One Town, One Product (OTOP) Next Generation Program ngayong nagsimula na ang pagtatayo ng Pasalubong Center sa San Ildefonso. (SFV/PIA-3/BULACAN)