LUNGSOD NG MALOLOS – Ginawaran ng Department of Health Central Luzon Regional Blood Center ang Bulacan Provincial Blood Center ng Plake ng Pagpapahalaga dahil sa pagiging consistent lead blood service facility partner ng mga lokal na pamahalaan na pinamamahalaan ng Pamahalaang Panlalawigan ng Bulacan sa isinagawang Sandugo Awarding Ceremony sa Premium Ballroom A, Premium Tower, Royce Hotel, Clark Freeport, Pampanga kamakailan.
Iginawad ni Regional Director Corazon Flores ang plake sa Bulacan Provincial Blood Center bilang pasasalamat sa pagkilala sa suporta nito sa Regional Voluntary Blood Services Program sa Campaign on Voluntary Non-Remunerated Blood Donation bilang Lead Blood Service Facility para sa Taong 2023.
Sinabi ni Gob. Daniel R. Fernando ng Bulacan na patuloy na susuportahan ng Pamahalaang Panlalawigan ng Bulacan ang mga layunin ng DOH at bawat lokal na pamahalaan na matiyak ang pagkamit sa isang ligtas at sapat na dugo.
Nakatanggap din ang Bayan ng Paombong na pinamumunuan ni Punong Bayan Maryanne P. Marcos ng Plake ng Pagpapahalaga bilang LGU partner.
Samantala, binati ni Fernando ang apat na nagwagi para sa City/Municipality with 1% Collection through Community-based Donation CY 2023 at ginawaran ng Plake ng Pagkilala kabilang ang Munisipyo ng Pandi na pinamumunuan ni Punong Bayan Enrico A. Roque, Lungsod ng Malolos sa pamumuno ni Punong Lungsod Abgd. Christian D. Natividad, Bayan ng Angat sa pamumuno ni Punong Bayan Reynante S. Bautista at Punong Lungsod Arthur B. Robes ng Lungsod ng San Jose Del Monte.
“Binabati ko po ang ating mga LGU na kinilala ng Sandugo Award. I am proud of your exemplary efforts on blood programs implementation. Nawa’y patuloy ninyong hikayatin ang inyong mga nasasakupan na makiisa at boluntaryong magbigay ng dugo upang mas maraming buhay ang ating masagip,” ani Fernando.
Ang Sandugo Award ay isang pagkilala na ibinibigay sa mga namumukod-tanging mga yunit ng lokal na pamahalaan, institusyon ng gobyerno, pribadong organisasyon at indibidwal para sa kanilang hindi matatawarang suporta at kontribusyon sa pagsusulong ng boluntaryong pagbibigay ng dugo.
