LUNGSOD NG MALOLOS–Ilulunsad ng Provincial Government of Bulacan ngayong buwan ng Marso ang kauna-unahan nitong athletic association para sa mga universities and colleges nito upang lalong pataasin ang kasanayan at kahandaan ng mga atletang Bulakenyo sa sports lalo na sa napipintong pagbubukas ng Bulacan Sports Academy.
Ito ang pahayag ni Gob. Daniel Fernando sa isang panayam ng mga mamamahayag kamakailanlang.
Tatawaging Bulacan Universities and Colleges Athletic Association (BUCAA) ang nasabing panlalawigang palaro sa basketball.
Ayon sa gobernador, makakasama sa asosasyon ang nasa 40 mga pang-publiko at pribadong kolehiyo at unibersidad sa lalawigan.
Ayon pa sa gobernador, magagamit ng mga mag-aaral sa itatayong Bulacan Sports Academy sa Bulacan Sports Complex sa lungsod na ito ang mga kasanayan sa basketball sa asosasyong binuo o BUCAA na regular na itataguyod kada taon o kada pagbubukas nito o season.
Paliwanag ng gobernador, sadyang magagaling ang maraming atleta sa lalawigan at nais pa niyang marami pa ang mahasa sa kahusayan kung kaya’t nararapat ang isang Sports Academy. Iba’t ibang uri ng sports ang ituturo sa akademya kabilang ang basketball, softball, volleyball, archery, at marami pang iba.
Isang patunay umano dito ang palagiang pagcha-champion ng lalawigan sa Central Luzon Regional Athletic Association (CLRAA). Ganunpaman, aniya, marami pang kompetisyon at larangan ng sports na dapat maitanghal ang galing ng mga kabataang Bulakenyo kung kaya’t isa ang Bulacan Sports Academy sa kanyang prioridad na maitayo at kung bakit orioridad din niya ang BUCAA.
