CAMP GEN. ALEJO SANTOS, Bulacan–Nasa 23 kalalakihan ang arestado sa magkakahiwalay na tupada sa iba’t ibang bayan nitong Sabado at Linggo, ayon sa report ng Bulacan Provincial Police Office na nakabase sa kampong ito.
Ayon kay Bulacan Police Director Col. Manuel Lukban Jr., ang mga arestadong sina Beltran Estrella ng Barangay Sta. Ines at Romeo Mercado ng Barangay Sibul sa Bayan ng San Miguel ay sinubukan pang suhulan ang mga miyembro ng pulisya matapos na sila ay arestihun dahil sa illegal na tupada.
Nagbibigay umano ng halagang P15,000 ang nasabing dalawang sabungero sa mga arresting officers.
Kaya naman, dagdag kaso pa sa kanila ang panunuhol sa law enforcers.
Nasa 21 iba pa ang arestado din sa magkakaibang tupada sa Obando, Pandi, Plaridel at Lungsod ng Meycauayan.
Nakuha sa kanila ang ilang buhay at sugatang mga panabong na manok, tari, mga kahon at bayong na naglululan ng panabong na manok at iba pa kabilang ang mga tayang pera.
Nananatiling bawal ang tupada sa umiiral na General Community Quarantine (GCQ) restriction dahil sa COVID-19 pandemic at kabababa lang na Alert Level 2 sa Bulacan.
