SIYUDAD NG MALOLOS, Bulacan, Philippines—Isusulong na ring itayo ang College of Medicine sa Bulacan State University (BulSU), ito ang pahayag ng matataas na opisyales ng Bulacan ngayong Lunes sa groundbreaking ng isang five-storey building structure na itatayo sa Main Campus nito sa siyudad na ito.
Ayon kay Senator Joel Villanueva na nasa likod ng pag-pondo ng national government sa P324-Million budget para sa construction ng Human Resource Building na inumpisahan ngang itayo ngayong araw, hinihintay niyang matapos ang feasibility study at blueprint ng BulSU College of Medicine at ibigay ito sa kanya ni President Cecilia Gascon upang ma-sponsor na niya ang pagpopondo dito at masimulan na itong itayo para sa kapakinabangan ng kabataang Bulakenyo na gustong maging doctor.
Ipinahayag ni Gascon sa nasabing groundbreaking na ngayon ay ginagawa na nila ang feasibility study para sa pagtatayo ng College of Medicine at ito ay nasa 2022 medium term plan ng unibersidad.
Ayon kay Villanueva, nais niyang manguna ang BulSU sa pagkakaroon ng public College of Medicine sa buong Region 3. Aniya, ang BulSU ay maaaring mapondohan ng malaki sa pagtatayo nito ng College of Medicine sa ilalim ng RA 11509 o Doctor Para sa Bayan Law na kanyang ipinanukala at nito nga lamang ay inaprubahan ni Pangulong Duterte.
Sa ngayon umano ay may P300-Milyong inilaan para sa pagtatayo ng tatlong public College of Medicines sa Davao region at sa Central Visayas sa ilalaim ng nasabing batas.
Ang hangarin umano ng batas ay magkaroon ng public College of Medicine sa bawat rehiyon sa bansa. “Nais nating mauna tayo dito sa Bulacan para sa Central Luzon. Pero sa ngayon ay pinupush din ng Pampanga. Pero kung kaya naman natin ang dalawa, mas mainam iyon para sa Central Luzon,” pahayag ng senador sa NEWS CORE.
Ikinalulungkot ng senador na sa sampung rehiyon sa bansa ay wala ni isa ang mayroong public school of medicine kaya’t ipinanukala niya ang Doctor Para sa Bayan Law noong isang taon habang pinahihirapan ng pandemya ang buong mundo partikular ang bansa. “Nakita natin na ang tao ay helpless, kaya naisip natin na dapat gumawa tayo ng hakbang, dapat makagawa tayo ng mag-iinspire sa tao. Kaya ipinanukala natin ang batas ng Doctor Para sa Bayan,” pahayag ng senador.
Ipinagmalaki naman ni Gob. Daniel Fernando na siya ay produkto ng BulSU noong siya ay high school pa lamang at ang unibersidad ay kilala pa lamang bilang Bulacan College of Arts and Trades o BCAT at sinabi niyang napakalaking tulong sa mga kabataang Bulakenyo kung mayroon ng libreng eskuwelahan sa medisina sa lalawigan sa pamamgitan ng BulSU College of Medicine.
Matagal nang tinitingnan ng mga opisyales sa Bulacan na ang mga estudyante ng medisina ng BulSU kapag naitayo na nag-ooperate na ito ay makakapag-intern o practice sa katabing Bulacan Medical Center (BMC) at Bulacan Infection Control Center (BICC).
Isang gusali ng BulSU na katabi ng BICC at BMC ang nauna ng ginamit bilang quarters ng mga medical front liners at nitong Marso na nagkaroon ng second wave ay ginamit bilang COVId-19 healing facility.
Ayon kay Gascon, ang Resource Management Building ay magiging research and community engagement facility hindi lang para sa Bulacan kundi maging para sa buong Region 3. Environment friendly ang itatayong gusali dahil sa passive design nito at pag gamit ng solar power system.
Ang Human Resource Building ay ang ika-4 na major infrastructure na ipinatayo ni Gascon simula ng maupo ito bilang pangulo ng unibersidad noong 2015.
Ito ay itinatayo sa Campus 2 ng BulSU o sa bahagi ng 25-hectares na pag-aari ng unibersidad katapat ng Campus 1 o Main Campus sa siyudad na ito. Ang 25-hectares lot property ng BulSU dating pag-aari ng Philippine Information Agency na ipinagkaloob ni Pangulong Joseph Estrada sa BulSU noong 1998 sa ilalim ng panahon ni dating Gob. Josefina Dela Cruz.
