BOCAUE, Bulacan–Halos 200 mga ka-birthdate ng namayapang Mayor Joni Villanueva ng bayang ito ang ipinaghanda ng pamilya Villanueva bilang selebrasyon at pag-alaala sa kanyang ika-44 na kaarawan noong Miyerkules, Nob. 24.
Umabot sa 191 na dumalo sa programang “Proud ako, ka- Birthdate Kita,” ang masuwerteng niregaluhan ng cake, cash gift at nahandugan ng masarap na pagkain ng pamilya Villanueva sa pangunguna ng kapatid ng namayapang mayor, dating Mayor Jonjon “JJV” Villanueva at asawa ng alkalde, dating CIBAC Congressman, Atty. Sherwin Tugna na ginawa sa JIL Compound.
Sa lugar din iyon mismo ibinurol ang alklade na yumao May 28, 2020 matapos gupuin ng sakit sa gitna ng pamimigay niya ng ayuda sa mga kababayan sa gitna ng pandemya.
Ayon kay dating Mayor JJV, binuhay nila ang tradisyong pagbo-blow-out ni Mayor Joni sa lahat ng kanyang ka-birthday tuwing kaarawan nito upang patuloy na makapagpasaya ng mga kababayan at upang din hindi mabura sa isipan at puso ng mga Bokawenyo ang kanyang kapatid at ang mga programa at proyekto nito sa kanilang bayan.
Inanunsiyo naman ni Atty. Tugna na kanila pa itong palalawakin sa mga susunod pang taon. Aniya, tiyak na maligaya ang kanyang asawa na nasa langit dahil sa ipinagpapatuloy nila na kanyang pamilya ang sinimulan nitong mga proyekto para sa bayan ng Bocaue lalo na ang mga simpleng okasyon tulad nito subalit nabibiyayaan ang maraming mamamayan.
Ipinalabas sa okasyon ang video ni Mayor Joni noong nabubuhay pa siya na pagdalaw sa mga residente at pagkakaloob ng mga handog kahilingan nito sa kanya sa pamamagitan ng pagsulat ng mga ito sa kanya.
